من كام سنه كنت بركب مكروباظ

من كام سنه كنت بركب مكروباظ رمسيس و السواق عمال ينادي رمسيس سيس سيس (الاجره جنيه و نص اللي طالع)

و شدد على موضوع الاجره ده يجي 20 مره

المهم طلع و انا اللي قاعد وراه و الناس بتبعت الاجره و انا بناوله 3 من الخمسه ياسطى .... 4 من العشره ياسطى ... وهكذا

و روحت مطلع من جيبي 2 جنيه و اديتهمله .... راح سأل كام من ال 2 جنيه .. فمردتش 

راح قايل بصوت اعلى كام واحد من ال 2 جنيه .. فمردتش برضه

راح باصصلي في المرايا كام واحد من ال 2 جنيه يافنديه .. مفيش مني رد خالص

راح مفرمل مره واحده ... و لافف و مبرق و هو هيتجنن و بيزعق : عمال اقولك كام من ال 2 جنيه و انت مبتردش ليه يا عم

انا بكل برود : مش الاجره جنيه و نص يا اسطى ؟

قاللي : اااااااه

قولتله : خلاص يبقى تسعه ياسطى من ال 2 جنيه .. مليتو البلد

الميكروباص كله اتشقلب ضحك و كان جنبي شيخ أزهري نام على كتفي من الضحك ... و السواق حس انه حمار و راح باصص قدامه و طالع و هو متشنج و عمال يغرز و كل ما الناس تشوفه متعصب يضحكوا اكتر و هو يتجنن اكتر دمعنا ضحك لحد رمسيس

بس كان هيقلبنا مرتين